Комитетите за индустрија, истражување и енергетика и за меѓународна трговија на Европскиот парламент денеска со 83 гласа „за“, девет „против“ и еден „воздржан“ ја одобрија Предлог-регулативата за забрана на увозот на руски енергенси во ЕУ од 1 јануари 2026 година.
Забраната се однесува на увоз на нафта, нафтени деривати, природен гас и течен природен гас (ЛНГ) од Русија во земјите членки на ЕУ.
Според предложените правила, енергетските оператори ќе можат да се повикаат на „виша сила“ за да ги раскинат договорите за увоз на руски енергенси, бидејќи „правно обврзувачката забрана за понатамошен увоз, како што е предвидено со оваа нова регулатива, експлицитно е дефинирана како суверен акт надвор од нивна контрола“.
Во делот на увозот на гас и ЛНГ исклучок од забраната се предвидува за постојните краткорочни договори до 17 јуни 2026 година и за долгорочните договори до 1 јануари 2027 година, под услов да се склучени пред 17 јуни 2025 година.
Европратениците, исто така, предлагаат и да се забрани привременото складирање на природен гас од руско потекло во објектите на ЕУ од 1 јануари 2026 година, како и да се преземат мерки за ублажување на ризикот од заобиколување на одредбите од регулативата.
Со денеска усвоената верзија на предлог-регулативата се брише и клаузулата што и дозволува на Европската комисијата да одобри привремено суспендирање на забраната за увоз на руските енергенси „во ситуации што ја загрозуваат енергетската безбедност на ЕУ“, а зголемени се и казните за прекршување на одредбите од регулативата.
Членовите на двата комитети со 84 гласа „за“, седум „против“ и еден „воздржан“ гласаа и за започнување нова рунда преговори со Советот на ЕУ за усогласување околу новата верзија на текстот на регулативата, која беше измената од страна на европратениците со амандмански интервенции.
