Исландската нискобуџетна авиокомпанија „Play“ денеска објави итен прекин на своето работење поради недостиг на финансиски средства. Одлуката дојде ненадејно и предизвика хаос на аеродромите, оставајќи илјадници патници без можност да стигнат до своите дестинации.
Компанијата, која беше една од најбрзо растечките нискобуџетни превозници во северна Европа, целосно ги стопираше летовите, а над 400 вработени остануваат без работа. „Play“ во последните години нудеше поволни авиолинии меѓу Исланд, Европа и САД, но како што наведуваат од менаџментот, финансиските притисоци станале неодржливи.
Одлуката за банкрот предизвика бројни реакции и критики, особено поради тоа што патниците беа информирани само неколку часа пред летовите. Дел од нив се заглавени на аеродроми во Европа и Америка, барајќи алтернативни решенија за патување.
Исландските власти најавија дека ќе се вклучат во процесот на управување со кризата, особено за поддршка на работниците и патниците. Експертите пак предупредуваат дека колапсот на „Play“ ќе има сериозни последици за туристичкиот сектор на Исланд, кој во голема мера се потпира на авионскиот сообраќај.
