Шпанскиот државен фонд Sepi доби овластување од тамошната влада да продолжи со стекнување до десет отсто од акциите во телекомуникациската компанија Телефоника. Целта е тој фонд да стане водечки акционер во еден од најголемите телекомуникациски оператори во светот, со што ќе се оневозможат намерите на Саудиската STC групација да го преземе најголемиот дел од акциите.
Според сегашните пазарни вредности, десет отсто удел вреди околу две милијарди евра, објави Телекомпапер.
Фондот Сепи потврди дека има намера постепено да ги откупува акциите, со цел да се минимизира влијанието на прометот врз цената на акциите на Телефоника.
Како што пренесува Ројтерс, купувањето на акции најверојатно ќе биде распоредено во период до два месеци, а ќе се финансира со издавање јавен долг.
По владината одлука, Телефоника објави дека останува фокусирана на својот стратешки план за следните три години.
Шпанската министерка за економија Надија Калвино рече дека потегот е во согласност со она што се практикува во другите големи европски земји како Франција и Германија, кои имаат удели или зголемуваат удели во големи стратешки фирми.
Во септември, Saudi STC се здоби со 9,9 отсто од акциите на Telefonica во вредност од 2,1 милијарди евра (2,23 милијарди долари). Кон крајот на октомври, еден месец по објавувањето на STC, SEPI соопшти дека размислува да купи свој удел.
Бидејќи Телефоника се смета за давател на одбранбени услуги, шпанското Министерство за одбрана има право на глас при купувањето и сопственоста меѓу пет и десет проценти, освен ако купувачот не се обврзе да не бара место во одборот.
