Франција и Белгија, најголемите купувачи на руски течен природен гас во ЕУ, не го поддржуваат планот на ЕУ целосно да престане да купува руски гас до 2027 година и бараат дополнителни гаранции за економските и правните последици од потегот пред да донесат одлука.
Франција изјави дека претпочита стратегија за барање алтернативни снабдувања, додека Белгија сака извештај со детали за економските последици од суспендирањето на купувањата на руски гас, објавува Политико.
Она што го браниме е европска стратегија за диверзификација која веќе е „на маса“, рече францускиот министер за енергетика Марк Ферачи, осврнувајќи се на планот на владата во Париз да ги замени испораките на руски гас со производи од Катар.
Во моментов, 97 проценти од европскиот увоз на течен природен гас од Русија доаѓа од четири земји: Франција, Белгија, Шпанија и Холандија.
Минатата година, четирите земји увезоа 16,77 милиони тони руски течен природен гас, според податоците од платформата за стоки Кплер, што претставува повеќе од половина од глобалниот извоз на Москва. Заедно, тие потрошија повеќе од шест милијарди евра за купување гориво.
За Шпанија и Холандија, третиот и четвртиот најголем купувач на руски течен природен гас во ЕУ, плановите на Европската Унија претставуваат добредојдена можност за прекинување на енергетските врски со Русија.
Се очекува дека во јуни Европската комисија ќе го разгледа прашањето за забрана на руски гас и нуклеарно гориво од Русија до крајот на 2027 година, како и дека Унгарија и Словачка ќе се обидат да спречат таква одлука, додава бриселскиот портал.
