Словачкиот премиер Роберт Фицо и се закани на Украина со сериозен конфликт доколку не дозволи транзит на гас преку нејзина територија кон Европа.
„Доколку Зеленски не ни го пушти нашиот гас, може да дојде до сериозен конфликт“, објави Фицо на својата Фејсбук страница.
Тој истакна дека Словачка и дава помош на Украина и го очекува истиот однос на Киев кон Братислава. Според него, тоа не треба да биде исклучиво „еднонасочна улица“.
„Зошто не може да има некаква солидарност кон нас“, праша словачкиот премиер.
Фицо претходно изјави дека Зеленски ја исклучува можноста за транзит на гас преку Украина од следната година. Сепак, словачкиот премиер смета дека постојат различни технички опции кои би овозможиле продолжување на транзитот на гас преку Украина до Европа. Тој посочи дека запирањето на транзитот на гас преку Украина до Европа на крајот ќе доведе до зголемување на неговата цена.
Сегашниот договор за транзит на руски гас во Европа преку Украина истекува на крајот на годинава. Украинските власти постојано изјавуваат дека не планираат да го продолжат.
