Британскиот деловен весник „Фајненшл тајмс“ (ФТ) објави дека Србија се подготвува да даде зелено светло за најголемиот рудник за литиум во Европа, откако Белград го прекина овој проект.
Претседателот на Србија, Александар Вучиќ, тврди дека британско-австралиската компанија и Европската унија дале нови гаранции за заштита на животната средина на западот од земјата, каде што треба да се експлоатира литиумот.
Во интервју за ФТ, Вучиќ рече дека експлоатацијата на литиум ќе обезбеди производство на батерии и електрични возила во Србија. Тој очекува следниот месец во Белград да дојдат бизнисмени и политичари на официјално обраќање до јавноста за овој проект.
„Ако завршиме сè, рудникот би можел да биде отворен во 2028 година“, изјави тој, додавајќи дека се очекува да се ископуваат 58.000 тони литиум годишно, што е доволно за производство на 1,1 милион или 17 отсто од електричните возила во Европа.
Тој е убеден дека овој рудник може да биде пресвртница за Србија и за остатокот од регионот.
Во јануари 2022 година, српската влада ги одзеде лиценците на Рио Тинто, по големите протести на оние кои беа против експлоатацијата на литиум, загрижени дека оваа рударска активност ќе предизвика загадување на водата, раселување на населението и многу повеќе.
Мартин Бејкер, аналитичар во британската компанија за собирање и анализа на податоци во индустријата Fastmarkets, нагласи дека се работи за наоѓалиште на висококвалитетен литиум кој е многу поголем од другите наоѓалишта на литиум во светот, пишува FT.
