Универзитетот Харвард поднесе тужба против администрацијата на претседателот на САД, Доналд Трамп, тврдејќи дека се обидува „да придобие контрола врз академското одлучување на Харвард“, пренесува британски Гардијан.
Универзитетот се бори против заканата на администрацијата за преглед на околу 9 милијарди американски долари од федералното финансирање, откако претставниците на Харвард одбија да го усогласат универзитетот со списокот на барања, кој вклучува назначување надворешен надзор за да се осигура дека гледиштата што се предаваат на универзитетот се „разновидни“. Харвард конкретно се бори против замрзнувањето на грантови од 2,2 милијарди долари.
Тужбата доаѓа во време кога администрацијата на претседателот Трамп се обидува да изнуди промени во повеќе институции во Ајви Лигата, по месеци студентски активизам фокусиран околу војната во Газа. Администрацијата ги претстви протестите во кампусот како антиамерикански, а универзитетите како либерални и антисемитски, обвинување кое претседателот на Харвард, Алан Гарбер, го отфрли.
Портпаролот на Белата куќа, Харисон Филдс, во соопштение рече дека „возот на федерална помош“ за институции како Харвард се ближи кон својот крај.
„Фондовите на даночните обврзници се привилегија, а Харвард не ги исполнува основните услови потребни за пристап до таа привилегија“, рече Филдс.
Во писмото во кое ја објавува одлуката на универзитетот да ги отфрли барањата на претседателот Трамп, Гарбер напиша: „Ниту една влада – без оглед на тоа која партија е на власт – не треба да диктира што можат да предаваат приватните универзитети, кого можат да примат и вработат, и кои области на студии и испитувања можат да ги следат“.
Гарбер, во изјавата објавена во понеделникот, повтори дека администрацијата на Трамп го удвоила својот одговор на одбивањето на универзитетот да се усогласи со барањата на администрацијата, и покрај тврдењата дека писмото што укажува дека финансирањето на федералните истражувања на Харвард е загрозено, било испратено по грешка.
„Владата, покрај првичното замрзнување на финансирањето од 2,2 милијарди американски долари, размислуваше за преземање чекори за замрзнување на дополнителни 1 милијарда долари грантови, иницираше бројни истраги за операциите на Харвард, се закани со образованието на меѓународните студенти и најави дека размислува за отповикување на статусот 501(c)(3), на Харвард кој е ослободен од данок. Овие дејства имаат сериозни последици во реалниот живот за пациентите, студентите, факултетот, персоналот, истражувачите и положбата на американското високо образование во светот“, се вели во писмото на Гарбер.
Харвард е првиот универзитет кој поднесе тужба како одговор на репресијата на Трамп врз врвните американски универзитети, за кои се вели дека неправилно се справиле со минатогодишните пропалестински протести и дозволиле антисемитизмот да тлее во нивните кампуси. Но, демонстрантите, вклучително и некои еврејски групи, велат дека нивните критики за воените дејствија на Израел во Газа погрешно се поврзуваат со антисемитизам.
Претходно овој месец, Белата Куќа испрати писмо до Харвард со списокот на барања, кој вклучува промени во политиките за прием на студенти, отстранување на признавањето на некои студентски клубови и вработување на нови професори.
Минатиот вторник, Трамп побара Харвард, најстариот и најбогатиот универзитет во САД и еден од најпрестижните во светот, да го изгуби статусот со кој се ослободува од данок, прво објави Си-Ен-Ен.
„Можеби Харвард треба да го изгуби статусот на даночно ослободување и да се оданочува како политички субјект ако продолжи да притиска политички, идеолошки и терористички инспирирани/подржувани „Болести?“ Запомнете, статусот на ослободување од данок е целосно зависен од дејствување во ЈАВЕН ИНТЕРЕС!“, напиша американскиот претседател во објава на неговата платформа Truth Social.
