Незадоволни сме и револтирани зашто откупувачите не сакаат да го слушнат нашето барање и немаат слух за покачување на откупните цени на тутунот, рекоа на денешната прес-конференција во Прилеп од Сојузот на земјоделските здруженија на Македонија. Тие денеска имаа состанок со откупувачите во Министерството за земјоделство во Скопје.
-Цела недела комунициравме со откупувачите на кои им ги доставивме нашите барања за зголемување на откупните цени на тутунот по класи. Денеска имавме средба во Министерството за земјоделство. Откупувачите воопшто немаат слух за зголемување на цените и одбиваат без никакво образложение. Прво не викаат на преговори, а од преговорите не излезе ништо и ние како Сојуз ја напуштивме седницата, изјави Менде Стомнароски, претседател на Сојузот на земјоделските здруженија на Македонија.
Но, додаде, остануваме на ставот дека мора да се зголемат цените.
Тутунарите бараат зголемување од минимум 20 отсто. Последните откупни цени кои не сакаат фирмите да ги зголемат се 300 денари за прва, 240 за втора и 180 за трета класа тутун.
Според тутунопроизводителите, годинашниов род е околу 13.000 тони тутун, што е околу половина помалку од лани. Тутун ќе откупуваат 10 фирми, а законскиот краен рок за почеток на откупот е 15 декември.
