Унгарскиот премиер Виктор Орбан изјави по разговорот со американскиот претседател Доналд Трамп во Белата куќа дека добил ослободување од санкциите на САД врз руските енергетски компании.
Орбан рече дека Унгарија успешно го заштитила својот план за намалување на сметките за енергија, како и дека ќе биде целосно ослободена од санкциите поврзани со гасоводите Турски тек и Дружба, објави унгарската агенција МТИ.
„Унгарија ќе продолжи да има најниски цени на енергијата во Европа“, истакна унгарскиот премиер, додавајќи дека Будимпешта ги подготвила сите потребни услови за тоа.
Според него, санкциите што можеа да ги направат испораките или увозот на енергија поскапи за Унгарија нема да бидат применети.
„Ова е целосно ослободување од санкциите, без временско ограничување“, истакна Орбан.
Тој додаде дека Унгарија и САД постигнале договор за соработка во областа на нуклеарната енергија, како и за укинување на санкциите воведени од администрацијата на поранешниот претседател Џозеф Бајден во врска со нуклеарната централа Пакс 2, објави агенцијата МТИ.
Орбан посочи дека нема забелешки од САД за изградбата на Пакс 2.
Како што изјави, врз основа на постигнатиот договор, американската компанија Вестингхаус ќе стане нов снабдувач на горивни прачки за унгарската енергетска индустрија.
Орбан додаде дека во исто време е постигнат договор за воведување на американска технологија во Унгарија и отворање на вратата за употреба на мали, модуларни SMR реактори.
Според него, Унгарија ќе добие и американска технологија што ќе ѝ овозможи безбедно складирање и отстранување на потрошеното гориво.
Трамп и Орбан се сретнаа во Белата куќа во петокот за да разговараат за зависноста на Унгарија од руската нафта и можноста за зајакнување на економската соработка меѓу двете земји.
Ова е нивна прва билатерална средба откако Трамп се врати во Белата куќа во јануари, објави Ројтерс.
