Македонски Телеком има мал пад во уделот на пазарот во Македонија според интерната проценка на компанијата, иако бројот на претплатници е зголемен за 2,8 отсто. Ова Телеком го соопштува преку веб страницата на Македонската берза, каде дава образложение за работата на компанијата.
„На пазарот на мобилната телефонија МКТ има удел на пазарот од 48,3% (интерна проценка, споредено со 49,1% на крајот од истиот период од претходната година). Базата на претплатници на крајот од првите девет месеци од 2023 година изнесува 1.330 илјади претплатници и е зголемена за 2,8% во однос на истиот период од претходната година“, стои во образложението на Телеком.
Од компанијата велат дека оперативната добивка пред камати и оданочување во првите девет месеци од годинава е зголемена за 27,7 отсто за разлика од истиот период од минатата година.
„Оперативната добивка пред камати, оданочување и амортизација (EBITDA маргината) во првите девет месеци од 2023 година е зголемена и изнесува 43,9% во споредба со 39,9% на крајот од истиот период од претходната година. Оперативната добивка пред камати и оданочување (EBIT) во првите девет месеци од 2023 година е зголемена за 27,7% во споредба со истиот период од претходната година. Како резултат на горенаведените движења на страната на приходите и трошоците како и финансиските приходи и расходи, нето добивката за првите девет месеци од 2023 година е зголемена за 29,7% во споредба со истиот период од претходната година и изнесува 1.653.104 илјади денари“, соопштува Телеком преку Македонската берза.
Пад од неполн процент има и во големопродажба, иако на пазарот на фиксни говорни услуги, Македонски Телеком останува лидер на пазарот.
„МКТ успеа да ја одржи водечката позиција на пазарот на фиксни говорни услуги со 61,8% (интерна проценка, споредено со 62,3% на крајот од истиот период од претходната година), односно 227 илјади корисници на крајот од првите девет месеци од 2023 година“, велат од Телеком.
