На светските берзи цените на акциите силно пораснаа минатата недела бидејќи инвеститорите веруваат дека САД и другите централни банки во светот го завршија циклусот на зголемување на каматните стапки, со оглед на тоа што инфлацијата постепено се намалува.
На Волстрит, Dow Jones минатата недела порасна за 5,1 отсто, на 34.061 поен, додека S&P 500 скокна за 5,9 отсто, на 4.358 поени, а индексот Nasdaq порасна за 6,6 отсто, на 13.478 поени.
Силниот скок на индексот го одразува верувањето на инвеститорите дека циклусот на зголемување на каматните стапки на американската централна банка е завршен. Во средата, претставниците на Федералните резерви одлучија да ги задржат каматните стапки непроменети, во опсег од 5,25 до 5,50 проценти.
Тоа беше втора седница по ред кога ФЕД ги остави каматните стапки непроменети, откако ги зголеми за 11 претходни сесии поради високата инфлација. Иако на прес-конференцијата, претседателот на ФЕД, Џером Пауел, ја остави просторот отворена за уште едно зголемување на каматните стапки, повеќето пазарни аналитичари сметаат дека тоа нема да се случи.
Дотолку повеќе, велат тие, поради она што го кажа Џером Пауел и како растот на приносите на државните обврзници имаше влијание врз американската економија. Имено, одреден број каматни стапки на кредитите за граѓаните и фирмите се одредуваат според каматата на обврзниците.
„Коментарите на Пауел во средата беа токму она што инвеститорите сакаа да го слушнат“, рече Џастин Бургин, потпретседател во Ameriprise Financial. Пазарот е поддржан и од деловните резултати на компаниите, иако многу компании ги намалија деловните проценки во тековниот, четврти квартал.
Лондонскиот FTSE индекс порасна минатата недела за 1,7 отсто, на 7.417 поени, додека франкфуртски DAX скокна за 3,4 отсто, на 15.189 поени, а париски CAC за 3,7 отсто, на 7.047 поени.
