„Силиконската Шесторка“ во изминатите 10 години „набилдала“ долг од речиси 278 милијарди долари за неплатен данок на приход во САД
Едни од најголемите американски технолошки фирми, попознати под псевдонимот „Силиконска Шесторка“, беа обвинети дека платиле речиси 278 милијарди долари помалку корпоративен данок на приход во изминатата деценија во споредба со законската стапка за американските компании кои остваруваат ист профит, пишува Гардијан.
„Амазон“, „Мета“, „Алфабет“, „Нетфликс“, „Епл“ и „Мајкрософт“ заедно имаат остварено 11 трилиони долари приход и 2,5 трилиони долари профит во изминатите 10 години.
Сепак, тие плаќаат просечни 18,8% во комбинираните национални и федерални корпоративни даноци, во споредба со просечните 29,7% во САД, според Фондацијата за фер даноци (ФТФ), која додава дека Силиконската шесторка применувала даночно избегнување во нивните деловни модели и пресметки.
Анализата на невладината организација покажува дека доколку се исклучат еднократните плаќања на данок за репатријација во САД, поврзани со историското избегнување на плаќање данок, просечниот придонес на корпоративниот данок на приход на шесте фирми ќе паднела на 16,1% во текот на изминатата деценија.
Компаниите, исто така, ги зголемија своите наведени даночни плаќања за 82 милијарди американски долари во истиот период со вклучување на непредвидени трошоци за данок што не очекуваат да го платат, се тврди во извештајот.
Пол Монаган, главен извршен директор на ФТФ, вели: „Нашата анализа ќе укаже дека избегнувањето на плаќање на даноци продолжува да се практикува во корпоративните структури. Придонесите за корпоративниот данок на доход на Силиконската шесторка се, изразени во проценти, многу пониски од она што го плаќаат секторите како што се банкарството и енергетскиот сектор во многу делови од светот“.
Монаган посочи на „агресивните даночни практики“, како што се позициите за непредвидени даноци, додека компаниите исто така вршат „огромно политичко влијание, како и економска моќ“, трошејќи милиони долари за лобирање во владите.
Извештајот доаѓа откако влијанието на американските технолошки компании беше истакнато со присуството на нивните шефови, вклучувајќи ги Џеф Безос од Амазон, Тим Кук од Епл и Марк Закерберг од Мета на втората инаугурација на претседателот на САД, Доналд Трамп.
Значително намалување на даноците за таквите компании наводно било во центарот на дискусиите со Обединетото Кралство, во обидите да обезбедат пониски царини за британские производи извезени во САД.
Монаган вели дека голем дел од приходите на Силиконската шесторка остварени во странство подлежат на ниски стапки на корпоративен данок на доход во САД, преку даночно олеснување за нематеријални приходи добиени од странство. Од ФТФ велат дека продажбата во други земји, надвор од САД, исто така подлежи на пониски стапки на данок на приход поради комбинацијата на пониски профитни маржи и резервирани добивки во јурисдикции со низок данок.
Од сите компании, Нетфликс има најниска стапка на реално платен данок споредбено со резервираната добивка, од 14,7 отсто, додека Microsoft платил 20,4 отсто. ФТФ додава дека Амазон има најлошо даночно однесување врз основа на повеќе фактори како што се вкупниот износ на платениот данок и „очигледното менување на прикажаниот профит“ – како што е резервирањето значителен дел од приходот во дел од Луксембург каде има низок данок. Сепак, корпоративната даночна стапка на Амазон беше 19,6%, многу пред Netflix, Meta (15,4%) и Apple (18,4%).
Од Амазон велат дека: „Владите ги пишуваат даночните закони, а Амазон го прави токму тоа што овие закони бараат од компаниите да го прават – плаќајќи ги сите должни даноци, истовремено инвестирајќи милијарди во создавање работни места и инфраструктура. Од 2010 година, Амазон инвестираше повеќе од 1,2 трилиони американски долари во САД и над 250 милијарди евра во Европа“.
Портпаролот на Мета посочи дека тие ги следат меѓународните и локалните даночни правила, осигурувајќи се дека ги плаќаат сите даноци потребни во секоја од земјите каде што работат.
Од Нетфликс велат дека владите ги одредуваат даночните правила и стапки, а компаниите ги почитуваат. Нетфликс се усогласува со релевантните даночни правила и прописи во секоја земја во која работат. Од Микрософт, Алфабет и Епл досега нема коментар.
