Извршниот директор на операторот „Северен тек 2“, Матијас Варниг ќе контактира со тимот на американскиот претседател Доналд Трамп во врска со повторното активирање на гасоводот, објави „Фајненшл тајмс“ (ФТ), повикувајќи се на добро информирани извори.
“Матијас Варниг планира повторно да ја активира работата на рускиот гасовод Северен тек 2 во Европа со поддршка на американски инвеститори. Планот на Варниг вклучува намера да контактира со тимот на Трамп преку американски претприемачи”, пишува ФТ.
Како што додава весникот, високи претставници на администрацијата на Трамп се свесни за плановите на Ворниг и ги гледаат како обид за обновување на кооперативните односи со официјална Москва, иако лидерите на неколку земји од ЕУ се загрижени за ваквиот развој на настаните.
Според лондонскиот весник, конзорциумот предводен од американски инвеститори веќе развил нацрт-договор со Гаспром кој би можел да биде склучен по укинувањето на американските санкции кон Русија, пренесува РИА Новости.
Сепак, како што изјави за ФТ неименуван поранешен американски функционер, договорот меѓу Москва и Вашингтон можеби не е доволен за обновување на гасоводот со оглед на европските санкции против Русија.
Северен тек 2 се протега од рускиот брег преку Балтичкото Море до Германија и се состои од две линии за транспорт на гас со вкупен капацитет од 55 милијарди кубни метри гас годишно.
Изградбата на овој гасовод беше целосно завршена во септември 2021 година, а се работи на негово повторно активирање, наведува руската агенција.
