Аргентинските власти дозволија цените на стоките и услугите да бидат наведени во долари, според прописот објавен од Министерството за економија.
„Покрај пезоси, цените може да бидат прикажани и во американски долари и други странски валути“, се наведува во документот.
Аргентинскиот министер за економија Луис Капуто објави на Твитер (X) дека купувачот ќе може да избере во која валута да плати.
Сепак, нема индикации за курсот по кој цените треба да се изразуваат во долари.
Во Аргентина има официјални и паралелни курсеви на црниот пазар. Аргентинскиот претседател Хавиер Милај, кој дојде на власт во декември 2023 година, вети политика на „доларизација“ во Аргентина за време на неговата изборна кампања.
Да потсетиме дека аргентинската економија излезе од рецесија откако забележа квартален раст од 3,9 отсто во третиот квартал од 2024 година, што е подобро од прогнозите на аналитичарите, кои очекуваа раст од 3,4 отсто.
Аргентинскиот претседател Хавиер Милај, кој беше избран на функцијата во ноември минатата година, им вети на гласачите дека ќе стави крај на сиромаштијата и хиперинфлацијата со драстични мерки како што се значително намалување на бројот на државни службеници и замрзнување на јавните проекти.
Новите мерки доведоа до пад на животниот стандард на населението и губење на стотици илјади работни места во Аргентина. Сепак, платите почнаа да ја надминуваат инфлацијата, работните места постепено се обновуваат, а нивото на сиромаштија се намалува.
