Се затвора фабриката „Mirabel-Werk“ во Гредиг, во близина на Салцбург, каде што повеќе од еден век се произведуваше познатиот „Echte Salzburger Mozartkugel“.
Последната моцарт кугла, 17,1 грама чоколада со мешавина од марципан, ф’стаци и нугат, е произведена на 5 декември, со што се означува крајот на една ера, пишува австриски Курир.
Корпорацијата „Монделез“, сопственик на сите права на овој симбол на австриската традиција, одлучи да го прекине производството во Австрија.
Се планира производството да се пресели во Полска или Чешка, но деталите остануваат нејасни.
Одлуката предизвика незадоволство, како кај вработените, така и кај локалната заедница.
„Тоа беше постепен крај“, вели Катарина Линднер, менаџер за квалитет, која работи во фабриката речиси десет години. Бројот на вработени е намален од 160 на само 40, а останатите до крајот на годинава ќе си заминат од работа.
„Salzburg Schokolade“, компанијата која досега произведуваше Моцарт кугли за Монделес, не закрепна по банкротот во 2021 година. Како причина го наведуваат растот на цените на суровините, енергијата и транспортот.
Зградата на фабриката, поради одбивањето да се пренамени во станбен простор, најверојатно уште долго ќе остане празна, додека опремата ќе се продава или демонтира. Ова го означува крајот на 127-годишната традиција, а Салцбург губи еден од своите најпознати гастрономски симболи.
