Летната туристичка сезона е во полн ек, а голем проблем на сите што се занимаваат со туризам годинава е адекватната работна сила.
Се бараат готвачи, келнери, собарки, но една реклама на социјалните мрежи привлекува повеќе внимание од другите. Имено, пишува дека се бара пица мајстор, а условите се повеќе од одлични.
„Ресторанот се наоѓа во Рафаиловиќи, обезбедено е сместување и храна. Платата е 1.800 евра, а работното време е осум часа. Се бара некој со најмалку три години искуство во овој бизнис. Исто така постои можност за трајно вработување, не само во сезона. Доколку некој сака да ја работи таа работа со овие услови, тогаш може да ни се јави на +382 67 247 395, велат за РИНУ во овој угостителски објект.
Иако во Црна Гора во моментов има над 30.000 невработени, мал дел од нив се одлучуваат да работат сезонски, па според традицијата работната сила доаѓа од регионот – Босна и Херцеговина, Србија и Македонија. Но, нивниот број е значително намален во последните години, па така работната сила на црногорското приморје е барана низ целиот свет.
„Многу мал процент од Црногорците одлучуваат да работат сезонски, па принудени сме да бараме работници во други земји. До оваа година граѓаните на Србија и на Босна и Херцеговина традиционално бараа работа на брегот, но сега во голема мера се отсутни, затоа што избраа некои други и подобро платени дестинации овде работат и луѓе од Непал, Индонезија и Молдавија“, рече Александар Јовановиќ, претседател на Здружението за угостителство во Будва.
Тој додава дека овој акутен проблем на црногорскиот туризам треба да се решава систематски и заеднички меѓу самите ресторани и надлежните министерства, бидејќи како што посочува, потребно е подобро поврзување на образовните институции и стопанството.
„Потребни се наши, вредни и спремни луѓе кои сакаат да работат. Да имаме наш стручен кадар. Сега се е на климави нозе. Затоа секоја година сме во се поголем проблем, како да најдеме работници“, заклучува Јовановиќ.
