Нашите партнери од Западниот Балкан добро го прифатија Планот на Европската комисија за раст на регионот и по усвојувањето на регулативата за него, очекуваме да почне неговата примена, изјави денеска портпаролката на ЕК за соседската политика и проширување Ана Писонеро.
– За нас е многу важно што на Европскиот совет на 1 февруари лидерите се согласија да обезбедат финансирање на Планот за раст, кои се состојат од два милијарди евра во грантови и четири милијарди евра во позајмици, истакна Писонеро, во одговор на новинарско прашање кога може да се очекува почеток на имплементацијата на Планот за раст на Западниот Балкан.
Според Писонеро, сега останува уште Европскиот Парламент и Советот на ЕУ да се усогласат околу регулативата за Механизмот за спроведување на Планот што е можно побрзо, по што ќе може почне неговото спроведување.
Во однос на дијалогот меѓу Белград и Приштина што се води со посредство на ЕУ, Писонеро истакна дека на двете страни им е јасно дека нивниот напредок на европскиот пат зависи од напредокот во нормализација на меѓусебните односи.
Портпаролот на ЕК за надворешни работи и безбедносна политика Петер Стано, од своја страна, изјави дека дијалогот меѓу Белград и Приштина продолжува и дека ЕУ не стравува од застој во него и воспоставување на статус кво состојба.
– Единствено стравуваме дека луѓето во Косово и во Србија ќе бидат оставени надвор од за нив важниот интегративен процес. Фактите што ги видовме и на кои реагиравме изминативе две недели, особено едностраните одлуки од страна на Косово и однесувањето на властите во Приштина, поттикнуваат стравување дека Косово би можело да биде оставено надвор од процесот, изјави Стано.
Тој нагласи дека ЕУ продолжува да работи заедно со партнерите во регионот и во меѓународната заедница да ги одврати двете страни од постапки кои би ги оддалечиле од дијалогот и од спроведувањето на преземените обврски.
