Светската економија годинава ќе расте со речиси исто темпо како во 2023 година, со подобрени изгледи за САД и послаб раст на економијата на еврозоната поради забавувањето во Германија, проценува Организацијата за економска соработка и развој (ОЕЦД). Светската економија годинава ќе порасне за 2,9 отсто.
Тоа би значело дека темпото на раст треба да се забави само малку во однос на 2023 година, кога активноста се зголеми за 3,1 отсто. И прогнозата за 2025 година покажува речиси ист раст, со проценета стапка на раст од три проценти. Поттик за раст ќе биде очекуваното намалување на каматните стапки во водечките економии, паралелно со слабеењето на инфлацијата. Американската економија би требало да порасне за 2,1 отсто во 2024 година и да забави до 1,7 отсто во 2025 година. Растот на цените треба да се забави, па ФЕД ќе ги намали каматните стапки, а реалните приходи ќе се зголемат. Активноста во еврозоната годинава ќе порасне само за 0,6 отсто, што е за 0,3 процентни поени помалку од претходно очекуваното поради забавувањето во Германија.
ОЕЦД малку ја намали проценката за следната година, од 1,5 на 1,3 отсто. Германската економија би требало речиси да стагнира, со прогнозирана стапка на раст од 0,3 отсто. Во 2025 година растот треба да се забрза до 1,1 отсто.
