Новоизбраниот американски претседател Доналд Трамп одлучи милијардерот Илон Маск и поранешниот ривал во трката за републиканскиот претседателски кандидат Вивек Рамасвами да го предводат Секретаријатот за ефикасност на владата, тело кое досега не постоело.
Како дел од формирањето на неговата администрација, Трамп вчера изјави дека ќе го номинира водителот на ТВ „Фокс њуз“, Пит Хегсет за секретар за одбрана.
Зборувајќи за Маск и Рамасвами, Трамп рече дека ќе работат надвор од владата за да и дадат „совети и насоки“ на Белата куќа и дека ќе работат со Канцеларијата за менаџмент и буџет на „структурни реформи од големи размери“ и ќе создадат „претприемачки пристап кон влада каква што досега не е видена.“
Тој додаде дека овој потег ќе испрати шокови низ владините системи.
Трамп во изјавата рече дека Маск и Рамасвами ќе го отворат патот за неговата администрација да ја „растури владината бирократија, да ги елиминира прекумерните регулативи, да ги намали непотребните трошоци и да ги преструктуира федералните агенции“.
Не е соопштено како ќе функционира овој секретаријат.
Кратенката на новиот секретаријат, што е DOGE на англиски, се совпаѓа со името на омилената криптовалута dogecoin на Маск. Вработените во федералната влада обично мора да го пријават својот имот и со што се поврзани со цел да се спречат потенцијални конфликти на интереси и да се отстранат различнит имоти доколку се поврзани со нивната работа. Бидејќи Маск и Рамасвами нема да бидат официјални владини службеници, тие не би морале да ги исполнуваат тие барања или етички ограничувања.
Со овие назначувања Трамп награди двајца поддржувачи од приватниот сектор, објави Ројтерс. Маск е сопственик на Tesla, X мрежата и Spacex, а Рамасвами е основач на фармацевтска компанија.
Маск вложи десетици милиони долари во кампањата на Трамп и зборуваше на неговите митинзи. Милијардерот е постојано присутен на имотот на Трамп Мар-а-Ларго на Флорида откако Трамп победи на претседателските избори.
Презентирајќи го својот избор за секретар за одбрана Пит Хегсет, Трамп во изјавата рече: – Пит е силен, паметен и навистина верува во Америка пред се. Со Пит на чело, непријателите на Америка се предупредени – нашата војска повторно ќе биде извонредна и Америка никогаш нема да попушти – најави американскиот претседател.
Кандидатот за секретар за одбрана Хегсет е ветеран на Националната гарда и служел во Авганистан, Ирак и Гвантанамо, Куба, според неговата веб-страница. Хегсет изјави дека ја напуштил војската во 2021 година, откако војската го означила како екстремист, која повеќе не го сакала.
Доколку биде потврден во Сенатот, тој би можел да го исполни ветувањето на Трамп дека ќе ги отпушти генералите што ги обвини дека спроведуваат прогресивна политика за малцинската и родовата различност, кои беа осудени од конзервативците, пренесува Ројтерс.
