Кинеските брендови за онлајн шопинг Тему (Temu) и Шејн (Shein) најавија дека ќе ги зголемат цените на нивните производи почнувајќи од 25 април по тарифите воведени од Соединетите Американски Држави.
Двете компании ги повикаа потрошувачите да ја искористат можноста да купуваат по тековни цени дотогаш, објави Ројтерс.
„Поради неодамнешните промени во правилата и царините во глобалната трговија, нашите оперативни трошоци се зголемија. За да продолжиме да ги нудиме производите што ги сакате без компромис за квалитетот, ќе бидеме принудени да ги прилагодиме цените, почнувајќи од 25 април“, се вели во соопштението на кинеските компании.
„Шејн“ и „Тему“ нудат голем број производи кои се движат од играчки до паметни телефони и нивниот бизнис модел се базира на онлајн купување и нарачки.
Нивниот начин на работење беше загрозен по неодамнешната наредба потпишана од американскиот претседател Доналд Трамп за затворање на „трговската дупка“ што дозволуваше пакети вредни помалку од 800 долари да влезат во САД од Кина и Хонг Конг без царина. Наредбата за поскапување на цените стапува на сила на 2 мај.
