Портпаролката на кинеското Министерство за надворешни работи Мао Нинг изјави дека Кина верува дека нема победници во трговската војна.
Нинг ја даде изјавата откако американскиот претседател Доналд Трамп рече дека неговиот тим размислува за воведување царина од 10 отсто за кинески производи што би можело да стапи на сила на 1 февруари, објави Чајна дејли.
„Многу пати го кажавме нашиот став. Веруваме дека нема победници во трговската војна. Кина секогаш цврсто ќе ги штити своите национални интереси“, им рече Мао на новинарите на редовната прес-конференција во Пекинг.
Потсетиме дека американскиот претседател Доналд Трамп најави дека ќе воведе царини за стоки од Европската унија и Кина.
Тој истакна дека неговата администрација размислува да воведе царина од 10 отсто за стоки увезени од Кина почнувајќи од 1 февруари, објави Ројтерс.
Трамп ја оправда оваа одлука со тоа што дрогата фентанил се испорачува од Кина во Мексико и Канада.
Во изјавата за новинарите во Белата куќа, Трамп потсети дека веќе вовел царини за кинески стоки за време на неговиот прв мандат.
