Македонија има сериозни геолози кои во многу блиската иднина ќе го создадат геолошкото депо и сите граѓани на Македонија ќе знаат точно со какво и во колку количини на богатство располагаме, пишува металуршкиот инженер и колумнист, Виктор Грозданов во својата последна колумна „Наука, а не лаги“.
Грозданов уште еднаш апелира Македонија да го следи примерот на Европската Унија која забрзано инвестира во развој на рударската индустрија преку објава на втор оглас за стратешки рударски проекти.
„Пред се мислат на бакар, литиум и никел. Нивната реакција по однос на овие метали е дека мора да се отворат нови рудници во наредните 27 месеци и државите да ги овозможат сите правно-формални механизми. Во Македонија имаме среќа да се најдеме на патот на бакарот кој поминува низ источна Македонија. Започнува од Крива Паланка, Кратово, Пробиштип, Старо Нагоричане, Валандово, и завршува во месноста Иловица –Штука. Токму оваа последна локација важи за најголем рудник во Македонија кој би се градел по најнови еколошки и индустриски стандарди и само во првите две години би внел во општините Босилово и Ново Село 350 милиони евра директна инвестиција“, пишува Грозданов во својата колумна.
Тој наведува дека изградбата на овој рудник во наредните 25 години би значел директно и индиректно вработување на членови на 3.500 домаќинства што би значело во околината импакт врз 28 проценти од населението и ќе има значителна улога за намалување на 14 проценти на дефицитот на државата Македонија.
„Најголемата придобивка за цела Македонија е тоа што првенствено ќе ја подигне и стабилизира просечната плата и ќе ја сопре чумата во демографска смисла, пишува Грозданов.
Тој во колумната повторно апелира дека надлежните и оние кои ги кројат државните политики неопходно е да ги слушаат научниците и професорите со релевантно научно знаење и искуство во стратешките важни сектори како што е рударството.
