Соборениот сириски диктатор Башар ал Асад префрлил 250 милиони долари во готовина во Москва во периодот од 2018 до 2019 година, објави Фајненшл тајмс (ФТ).
Цитирајќи ги финансиските документи разгледани од весникот, ФТ вели дека сириската централна банка испратила речиси два тони банкноти од 100 и 500 евра во земјата, кои потоа биле депонирани во санкционирани руски банки.
Документите до кои дојде британскиот дневен весник откриваат дека централната банка на Сирија до московскиот аеродром Внуково транспортирала пратки од американски долари и евра, тешки речиси два тона. Тие средства беа депонирани во руски банки кои се под санкции на Соединетите Американски Држави.
Трансферите се случија во време кога Сирија, соочена со исцрпени девизни резерви, во голема мера се потпираше на руската воена поддршка, вклучително и помошта од групата Вагнер.
„Режимот мораше да ги префрли своите пари во странство, на безбедно место, за да може да ги искористи тие средства за да набави луксузен живот… за режимот и неговиот близок круг“, рече Дејвид Шенкер, поранешен помошник секретар на САД.
Сириските пари се користеле за различни цели, вклучувајќи плаќање на пченица, воени трошоци и услуги за печатење пари во Русија. Извор запознаен со трансакциите забележа: „Кога една земја е целосно изолирана и под санкции, нејзината единствена опција е готовина“.
Истрагата на Фајненшл Тајмс, исто така, откри како семејството и соработниците на Асад ги преместувале средствата во Русија. Од 2013 година, роднините на Асад купиле најмалку 20 луксузни станови во Москва користејќи сложени финансиски аранжмани.
Ејад Хамид, висок истражувач во Сириската програма за правен развој, рече: „Русија со години е рај за финансиите на режимот на Асад“, нагласувајќи ја нејзината улога во избегнувањето на санкциите.
Американските власти го обвинија режимот на Асад за широко распространета корупција и криминални активности за финансирање на воените напори. Министерството за финансии на САД воведе санкции против неколку сириски и руски субјекти вклучени во олеснувањето на овие парични трансфери.
Малик ал-Абдех, сириски аналитичар, истакна: „Сириската држава можеби и плаќа на руската држава за воена интервенција“. Откритијата фрлаат светлина на тоа како режимот на Асад преживеал финансиски за време на разорната граѓанска војна во Сирија, додека западните санкции го туркаа сè подлабоко во орбитата на Москва.
Асад, кој владееше со Сирија со цврста рака речиси 25 години, побегна во Русија на 8 декември откако антирежимските групи ја презедоа контролата врз Дамаск.
Преземањето дојде откако борците на Хајат Тахрир ал-Шам (ХТС) ги зазедоа клучните градови низ земјата во молскавична офанзива што траеше помалку од две недели.
