Американската компанија за платежни услуги Visa доби одобрение од кинеската централна банка да започне со подготовки за основање институција за клиринг на платежни картички во Кина. Со ова се става крај на повеќегодишното чекање за пристап до еден од најголемите пазари за платежни трансакции во светот.
Одлуката претставува значаен чекор за Visa, која сака да им се приклучи на конкурентите Mastercard и American Express, кои веќе добија дозвола за работа во овој сегмент на кинескиот пазар. Воедно, ова е уште еден знак за постепено отворање на строго регулираниот финансиски сектор на Кина, објави „Ројтерс“.
Народната банка на Кина издала административно одобрение за компанијата „Visa Information Technology (Beijing) Co Ltd“, основана во Кина со странски капитал од Visa. Одобрението ѝ овозможува да ги започне подготвителните активности, но сè уште не значи дека може веднаш да започне со работа.
„Одобрувањето на нашето барање за почеток на подготвителните активности претставува значаен чекор напред во долгорочната посветеност на Visa на Кина“, изјави извршниот директор на компанијата, Рајан Мекинери.
Visa ќе има рок од една година да ги заврши подготовките, по што ќе може да поднесе барање за започнување со работа. Кинеската централна банка, заедно со главниот регулатор на банкарскиот сектор, потоа ќе го разгледа барањето и, доколку го одобри, ќе издаде лиценца за клиринг на платежни картички.
На кинескиот пазар доминира државната компанија „China UnionPay“, а Visa со години се обидува да добие поголем пристап до оваа област. Според извори на „Ројтерс“, компанијата се надевала дека ќе добие целосна сопственост врз идното заедничко претпријатие, што би претставувало невообичаен аранжман за кинескиот пазар.
Некои аналитичари ја толкуваат одлуката и како можен сигнал за подобрување на економските односи меѓу Пекинг и Вашингтон. Џорџ Чен, партнер во консултантската компанија „Asia Group“, оценил дека одобрението може да се гледа како гест на добра волја од Кина кон САД во пресрет на очекуваната средба меѓу кинескиот претседател Си Џинпинг и американскиот претседател Доналд Трамп на маргините на самитот на АПЕК во Шенжен во ноември.
Поголемиот пристап до кинескиот финансиски сектор долго време е еден од приоритетите на Вашингтон, кој бара странските компании да добијат поотворени и рамноправни услови за работење.
Mastercard доби одобрение во 2020 година, во партнерство со локалната клириншка институција NetsUnion Clearing Corp, да започне подготовки за работа во Кина. Истата година, дозвола за клиринг на платежни картички доби и кинеското заедничко претпријатие на American Express.
Колкав е потенцијалот на пазарот покажуваат податоците на кинеската централна банка: во текот на 2025 година во Кина биле извршени 4,6 билиони трансакции со платежни картички, во вкупна вредност од 963,6 билиони јуани, односно околу 143,92 билиони американски долари.
