Бугарската такса за рускиот природен гас од денеска важи за Македонија. Оваа давачка бугарските власти ја претставија како санкција кон Русија, а освен за Македонија, ќе важи и за дистрибуција во Србија и Унгарија.
Македонските власти пак, бараат начин како да се заобиколи таксата, со цел да нема удар врз економијата во земјава. А додека се бара решение, Бугарија веќе доби дозвола од Европската Комисија да ги користи парите од таксата за потребите на државата.
Министерството за економија останува на ставот дека не се против воведување на санкции против Русија, но уште не се знае како надлежните ќе постапуваат во однос на таксата која може да предизвика нов раст на цените на производите и дел од услугите.
Македонските власти чекаат одговор од Европската комисија и од Европската енергетска заедница за овој нов проблем, бидејќи се бара начин, како да се ослободат количините на природен гас кои ги има закупено од Гаспром во интерконекторот, што на Македонија ќе и овозможи да побара нови извори на гас.
Таксата изнесува 10 евра за мегават час природен гас, одлука која Бугарија ја усвои на 13ти октомври.
