Дали ова е скандал од епски размери, корупција или само вообичаена практика?
Претставниците на ЕУ и Швајцарија оценија дека подароците што групата швајцарски милијардери му ги дале на американскиот претседател Доналд Трамп, меѓу кои златен часовник Ролекс и гравирана златна прачка во вредност од 130.000 долари (околу 113.000 евра) биле „непочитувачки“ и дека биле дадени за Швајцарија да добие намалување на царините од САД.
Италијанскиот член на Европскиот парламент Пасквале Тридико рече дека е „згрозен“ од скапите подароци, кои биле дадени неколку недели пред Трамп да одлучи да ги намали царините од 39 проценти за швајцарскиот увоз на 15 проценти, објавува Гардијан.
„Ова е навистина ужасно“, рече Тридико, додавајќи дека се чини дека станува збор за „претворање на надворешната политика во политика на поединци“.
Претседателката на Зелената партија во Швајцарија, Лиза Мацоне, изјави дека подароците покажуваат дека „корумпираната логика на Трамп ја отрула швајцарската елита“.
„Неприфатливо е федералниот совет да се потпира на помошта на економска елита која ги претставува приватните интереси и нема демократски легитимитет во преговорите со американскиот претседател“, додаде Мацоне.
Подарокот на швајцарските милијардери за Трамп можеби ќе останеше незабележан доколку новинарите не забележаа нов часовник на неговата маса во Овалната соба на Белата куќа, по што беше утврдено неговото потекло, кога беше утврдено дека таков часовник не е достапен во слободна продажба.
Златната прачка, украсена со броевите 45 и 47 во чест на првиот и вториот претседателски мандат на Трамп, беше донирана од Марван Шакарчи, раководител на швајцарската компанија за рафинирање злато MKS.
Швајцарскиот публицист и политички коментатор Ханес Бриши изјави за швајцарската радио станица Базел дека подароците биле „недостојни“, додека швајцарскиот министер за економија, Ги Пармелин, ги отфрли критиките дека станува збор за лобирање и дека одлуката на Трамп да ги намали царините за Швајцарија на 15 проценти, во согласност со ЕУ, е „големо олеснување“.
Портпаролот на Белата куќа негираше каква било поврзаност помеѓу подароците и договорот за царини, велејќи дека „единствениот посебен интерес што го движи донесувањето одлуки на претседателот Трамп е најдобриот интерес на американскиот народ“.
Како што е објавено, Белата куќа прифатила илјадници подароци што влегле во Националниот архив и дека претседателот може лично да одлучи да ги задржи или купи дел од примените подароци, но дека тие може да бидат оданочени.
