Американскиот претседател Доналд Трамп ќе му понуди на секој федерален работник кој ќе поднесе оставка отпремнина од приближно осум месеци плата и бенефиции, објави NBC News.
Неименуван функционер изјави за NBC дека меѓу пет и 10 отсто од федералните работници се очекува да дадат отказ, со што се проценува дека би заштедиле 100 милијарди долари.
„Американските даночни обврзници ги плаќаат платите на вработените во федералната влада и затоа заслужуваат вработени кои работат во нивно име и кои всушност се појавуваат на работа во нашите прекрасни федерални згради, кои исто така ги плаќаат даночните обврзници“, рече портпаролката на Белата куќа, Каролин Ливит.
Таа рече дека оние „кои не сакаат да работат и да придонесат Америка повторно да биде голема“ можат да заминат, а администрацијата на Трамп ќе плати отпремнина.
Понудата ќе биде испратена до федералната работна сила преку нов систем поставен од администрацијата на Трамп, кој им дава можност на службениците да испратат е-пошта до сите федерални вработени одеднаш.
Е-поштата ќе содржи нацрт писмо за оставка, а доколку некој сака да поднесе оставка, ќе може да одговори со зборот „оставка“, пренесува NBC.
