Германската министерка за надворешни работи Анален Баербок ја критикуваше нејзината влада дека е неодлучна за помошта за Украина, укажувајќи на длабоките поделби во привремената влада и несогласувањето меѓу главните политички партии пред претстојните избори, пишува Политико.
„Германија во моментов не се гледа како движечка сила во европската мировна политика и, искрено, тоа ме боли. Дури и сега, за време на изборната кампања, некои гледаат како брзо да освојат неколку гласови на парламентарните избори, наместо да земат вистински одговорност за обезбедување мир и слобода во Европа“, изјави Бурбок за Политико.
Таа ја изнесе својата фрустрација кога германскиот канцелар Олаф Шолц од Социјалдемократската партија (СПД) ја отвори дебатата барајќи новата помош за Украина да биде условена со олеснување на фискалните ограничувања во земјата.
Шолц во телевизиско интервју рече дека нема да се согласи на пакет помош од три милијарди евра за Украина, кој го поддржуваат Бербок и други германски лидери, освен ако не се финансира со ново задолжување.
Министерката повеќе пати изјави дека е загрижена за, како што смета, колебливиот пристап на Германија за давање помош за Украина, нагласувајќи дека нејзината влада ја губи довербата кај нејзините европски сојузници.
„Таа доверба не смее повторно да биде загрозена со двоумење, бидејќи тоа може да предизвика загриженост кај другите земји дека Германија нема да застане на нивна страна“, рече Бербок.
Министерката остро ги критикуваше претходните германски влади, особено Христијанско-демократската унија (ЦДУ) на поранешната канцеларка Ангела Меркел и СПД која претходно владееше во коалиција со ЦДУ, за изградбата на контроверзниот гасовод Северен тек 2 меѓу Русија и Германија.
Таа истакна дека изградбата на проектот никогаш не била само економски, туку била и политички мотивирана, а тоа станало уште поочигледно по неодамнешните случаи на „руска саботажа“ на подморските кабли во Балтичкото Море.
Пред изборите во Германија на 23 февруари, партијата на Аналена Бербок, „Зелените“, е на четвртото место со поддршка од 14 отсто, далеку зад водечката конзервативна коалиција од канцеларскиот кандидат Фридрих Мерц.
Доколку победат конзервативците, не е јасно која партија или партии ќе бидат поканети да формираат коалиција. Сепак, Зелените и конзервативците се согласуваат за многу прашања за надворешни работи, вклучително и Украина и одбранбените инвестиции, посочува Политико.
Бербок истакна дека Германија мора да инвестира повеќе во својата безбедност, велејќи дека е „клучно“ земјата постојано да инвестира повеќе од два отсто од БДП во одбраната.
Таа најави и дека е подготвена да соработува со администрацијата на новоизбраниот американски претседател Доналд Трамп, нагласувајќи дека Америка останува еден од најблиските партнери на Германија.
