Новоизбраниот американски претседател Доналд Трамп ги критикуваше, како што рече, неправедните такси за американските бродови кои минуваат низ Панамскиот канал и се закани дека ќе побара да му се врати контролата на пловидбата на Вашингтон.
Тој укажа и на зголеменото влијание на Кина околу каналот, што според него е загрижувачки тренд за американските интереси бидејќи американските компании зависат од каналот за движење на стоки меѓу Атлантскиот и Тихиот океан.
„Нашата морнарица и трговијата беа третирани на многу неправеден и непоштен начин. Теди Рузвелт беше претседател на Соединетите држави во времето на нејзината изградба и тој ја разбра моќта на морската моќ и трговијата. Кога претседателот Џими Картер непромислено го даде за еден долар, за време на неговиот мандат, беше управуван само од Панама, не од Кина или некој друг. Исто така, на Панама не и беше дозволено да наплатува високи цени и стапки на САД, нивната морнарица и корпорациите кои работат во нашата земја за минување низ каналот“, изјави Трамп на својата социјална мрежа Truth Social.
Тој додаде дека таксите што ги наплаќа Панама се „смешни“, особено со оглед на извонредната великодушност на САД кон Панама.
Панамскиот канал, завршен од Соединетите држави во 1914 година, беше вратен на централноамериканската земја според договорот од 1977 година потпишан од демократскиот претседател Џими Картер. Панама презеде целосна контрола над каналот во 1999 година.
„Никогаш не би дозволил да падне во погрешни раце! Ако Панама не може да обезбеди безбедно, ефикасно и доверливо функционирање на каналот, тогаш ќе бараме да ни биде вратен Панамскиот канал, целосно и без прашање“, предупреди Трамп.
Властите во Панама не реагираа веднаш на соопштението на Трамп, пренесува Voice of America.
Околу пет проценти од глобалниот поморски сообраќај минува низ Панамскиот канал, дозволувајќи им на бродовите кои патуваат меѓу Азија и источниот брег на САД да ја избегнат долгата, опасна рута околу јужниот дел на Јужна Америка.
Главни корисници на преминот се САД, Кина, Јапонија и Јужна Кореја.
Управата на Панамскиот канал објави во октомври дека водениот пат заработил рекордни приходи од речиси 5 милијарди долари во последната фискална година.
