Хрватската влада се најде притисната под сè потешкиот товар на незадоволство од кратковидоста на претходните политики за домување.
Бројките се јасни: 900.000 станови, или 40 отсто од станбениот фонд, во Хрватска не се користат за домување. Во исто време, цените на недвижностите вртоглаво пораснаа. Наместо станари, туристи се пожелни во овие станови, а тоа сега треба да се промени.
Спроведуваме и одговорни туристички политики кои нема да бидат едноставни и нема да бидат лесни, а можеби за добар дел од нашите сограѓани, односно не сограѓани туку туристички работници нема да бидат пожелни – вели министерот за туризам, Тончи Главина.
Според новиот закон, за краткотрајното издавање на станови во станбени единици и згради ќе треба согласност и договор од 80 отсто од сосопствениците, како и непосредните соседи. Оваа мерка е насочена кон блокирање на галопирачката апартманизација. Според некои тоа не го загрозува туризмот, пишува Seebiz.
Големата побарувачка го создаде овој дел од туристичката понуда што беше со граничен квалитет. И сега од двете страни, од страна на законот, а од друга страна од пазарот, кој со овогодинешната намалена побарувачка веќе на некој начин ги диференцира понудите во становите, односно тој дел од туристичката понуда не беше најдобар – тврди Борис Жгомба, претседател на Здружението на туристички агенции при ХГК.
Една од целите е да се создаде рамнотежа меѓу желбата на сопственикот да го користи станот како инвестиција, но и да се обезбеди квалитет на домување за останатите сосопственици – вели агентот за недвижности Мартина Матаиќ Шкугор.
А тој баланс треба да се постигне со зголемување на бројот на станови за долгорочно издавање. Бидејќи станбеното прашање денес ги одразува најголемите социјални нееднаквости.
Станува збор за странски работници и други привремени работници во Хрватска. Овие се сезонски, а ги има многу. Станува збор за стари луѓе кои живеат во центрите на поголемите градови. Запоставени се центрите на поголемите градови во Хрватска. Запоставени со децении. А без да се подигне квалитетот на животот, не можеш да го подигнеш ни изгледот на градот, функционалноста на градот во тие градови – изјави економистот Жељко Иванковиќ.
Има и огромни регионални нееднаквости, предупредува Иванковиќ. Гаража во Сплит може да ви донесе повеќе приходи отколку куќа на земјоделски имот во Славонија – додаде тој.
Министерот за финансии Марко Приморац претпазливо најавува даночен притисок врз стотици илјади празни станови со цел да ги принуди нивните сопственици да престанат да ги третираат недвижностите само како вид на заштеда и да ги нудат за долгорочна кирија.
