Меѓународниот трговски систем е на работ на колапс поради растечките геополитички тензии, изјави во средата генералниот секретар на ОН, Антонио Гутереш, предупредувајќи го светот да не се „дели“ на ривалски блокови.
„Меѓународниот трговски систем е под закана од сите страни и се движи на работ на колапс“, рече Гутереш на церемонијата по повод 60-годишнината на Агенцијата на ОН за трговија и развој (УНКТАД).
Тој во седиштето на Обединетите нации во Европа во Женева рече: „Геополитичките тензии растат, нееднаквостите растат, климатската криза силно погодува многу земји во развој“.
„Новите и долготрајни конфликти имаат широки последици за глобалната економија. Трговијата стана меч со две острици – извор и на просперитет и нееднаквост, меѓусебна поврзаност и зависност, економски иновации и деградација на животната средина“, рече тој.
Светската трговска организација и Меѓународниот монетарен фонд со месеци предупредуваат за геоекономска фрагментација, во која земјите ја поддржуваат трговијата во нивниот регион или одреден трговски блок, наместо на глобално ниво, пренесува АФП.
