Ќе останат ли 10.000 граѓани со покуси ракави? Осигурителните компании во вторник ќе одлучуваат дали ќе им ги вратат парите на оние кои платија за 15% поскапи полиси.
Според проценките, од 400.000 автомобили чија моќност надминува 44 киловати, неделно во просек се регистрираат по 10.000 возила, што значи толку лица платиле од 840 до 1600 денари повеќе за полисите за автоодговорност. Владата на 2 мај го смени Тарифникот и ги врати цените по старо, но граѓаните кои веќе платија – сега се оставени на волјата на осигурителните компании да одлучат што понатаму.
Формално правно, нема основ да се вратат, затоа што не може законот да важи ретроактивно, велат правниците. Но, како општествено одговорни компании, ако сакаат, можат да им ги вратат. Парите би се вкалкулирале во регистацијата за следната година.
Од соопштението на Групацијата за осигурување, се гледа дека компаниите не се задоволни со враќање на ценовникот назад, за кој велат дека е донесен еднострано, но, за панатамошни дејствија, ќе одлучувале следната недела.
Инаку, Националното биро, по барање на осигурителните компании одлучи на 25 април да ги зголеми цените за автоодговорност за 15 %.
По ова негодуваа од Агенцијата за супервизија, кои рекоа дека поскапувањето е неоправдано, во време кога компаниите билдаат солидни добивки. Потоа Комсијата за автоодговорност донесе препораки за враќање на цените назад, кои компаниите не ги прифатија. На крај мораше да реагира Владата, која ги врати цените на ниво од пред 10 тина дена.
