Рекорден регрес во Словенија: Секој вработен добива по 740 евра, исплатата мора да заврши до 18 декември

Работниците во Словенија годинава ќе добијат повисок зимски регрес во износ од 740,94 евра. Сумата е за 102 евра повисока од минатогодишната, а работодавачите имаат законска обврска да ја исплатат најдоцна до 18 декември.

Правото на зимски регрес беше воведено со посебен закон во ноември минатата година, со кој оваа исплата стана задолжителна за работодавачите во приватниот и јавниот сектор.

Износот е директно поврзан со минималната плата во земјата и претставува половина од нејзината бруто-вредност. Бидејќи минималната бруто-плата во Словенија за 2026 година изнесува 1.481,88 евра, зимскиот регрес достигнува 740,94 евра. Минатата година работниците добија 638,86 евра.

Правото важи и за приватниот и за јавниот сектор

Законската обврска се однесува на сите работодавачи, без оглед на тоа дали компанијата остварила добивка или работела со загуба.

Целиот износ им следува на вработените кои работеле во текот на целата година кај истиот работодавач и имале полно работно време.

Работниците кои биле вработени само дел од годината или работат со скратено работно време добиваат соодветен пропорционален износ.

Важно е и тоа што исплатата мора да биде во пари. Работодавачите немаат право законскиот регрес да го заменат со ваучери, подароци или производи.

Државата обезбедува помош и за општините

Словенечкото Министерство за финансии подготви инструкции за општините, според кои државата ќе им надомести 60 проценти од трошоците за регресот за вработените во општинските администрации и јавните установи што ги финансираат.

На овој начин се намалува финансискиот товар врз локалните буџети, а истовремено се обезбедува исполнување на законската обврска.

Регресот е ослободен од данок и придонеси до законскиот износ

Една од поважните придобивки за работниците е што регресот до пропишаниот износ не влегува во основицата за пресметка на данокот на доход и социјалните придонеси.

Тоа значи дека вработените го добиваат целиот законски предвиден износ, без дополнителни одбитоци.

Сепак, ова право не се однесува на сите жители на Словенија, туку исклучиво на лицата кои се во работен однос.

Со оваа мерка Словенија воспоставува задолжителна дополнителна годишна исплата за работниците, чија вредност расте заедно со минималната плата.

Поврзани вести

Останете поврзани
36,851фановикако
12,358следбенициследете
Последни написи