Националната канцеларија за враќање и заштита на имотот соопшти дека открила „големи количества готовина закопани во шуми, скриени во земјоделски објекти, магацини и станбен објект, како и складирани во сеф со висока вредност на тајна локација“.
Меѓу пронајдените пари имало повеќе од пет милијарди форинти, околу 2,6 милиони евра и 1,2 милиони долари, чија вкупна вредност изнесува околу 18,1 милион долари.
Националната канцеларија за враќање и заштита на имотот, која неодамна беше основана од новата унгарска влада, соопшти дека парите биле откриени по дводневна претресна акција во главниот град Будимпешта и во три унгарски области.
Канцеларијата има истражни и обвинителски овластувања за гонење случаи на злоупотреба на јавни средства и сомнежи за корупција, за која критичарите на Виктор Орбан тврдат дека била широко распространета за време на неговите 16 години на власт.
Заплената била дел од кривична постапка против поранешниот министер за национален развој Миклош Сестак, кој ја извршувал функцијата за време на владеењето на Орбан.
Тој е осомничен дека примил повеќе од 37,2 милиони долари во мито и провизии поврзани со набавка на возила за унгарската државна автобуска компанија, како и со државни градежни проекти.
Сестак бил приведен во полиција кон крајот на септември.
Видеото објавено на Фејсбук од Националната канцеларија за враќање и заштита на имотот прикажува истражители како клечат покрај големи купови готовина, како и лопати со кои ноќе се копа земјата на локација што изгледа како шума.
Се огласи Маѓар
Премиерот Петер Маѓар, кој вети дека ќе бара одговорност за сомнежите за корупција за време на владеењето на Орбан и дека ќе го врати злоупотребениот јавен имот, соопшти дека 12 вработени во унгарскиот државен трезор поминале осум часа броејќи ги пронајдените пари со помош на пет машини за броење банкноти.
Тој рече дека откритието „официјално го означува крајот на мафијата Фидес-КДНП“, мислејќи на поранешната владејачка коалиција на Орбан.
„Од денес, Виктор Орбан е докажан мафијашки шеф. Паднат мафијашки шеф. А Фидес е криминална организација“, напиша Маѓар.
Ова откритие е најновиот развој на настаните во напорите на новата унгарска влада да ги истражи сомнежите за злоупотреби извршени за време на мандатот на Орбан.
Неколку лица веќе се во притвор поради сомнежи за измама, злоупотреба и корупција
Во понеделникот, полицијата го привела помладиот брат на Орбан во рамките на истрага за сомнителна трговија со луѓе и злоупотреба на влијание.
Неколку други функционери од ерата на Орбан, меѓу кои и поранешен гувернер на Централната банка, исто така се наоѓаат во полициски притвор поради сомнежи за измама и корупција.
Минатиот месец, Централното истражно обвинителство соопшти дека притворањето на гувернерот на Централната банка, Ѓерѓ Матолчи, е поврзано со наводна злоупотреба на фондација на централната банка, на која ѝ припаѓале 288 милијарди форинти јавен имот, односно околу 817,8 милиони долари.
Орбан, чија десничарска партија Фидес загуби од унгарската десноцентристичка и проевропска партија Тиса на убедливите избори во април, ги осуди истрагите и приведувањата, оценувајќи ги како политичка „тиранија“ чија цел е да го отстранат од политичката сцена.
