„Студенац“, најголемиот ланец маркети во Хрватска, во сопственост на полскиот инвестициски фонд Enterprise Investors, побара отворање на предстечајна постапка. Тоа се случи по повеќегодишното деловно проширување на компанијата.
Предстечајната постапка овозможува реструктурирање на долговите и финансиските обврски кон доверителите, а долгот на „Студенац“ на крајот на 2025 година изнесувал 450 милиони евра.
На интернет-сервисот FINA Info.BIZ на хрватската Финансиска агенција (FINA) стои дека сметката на компанијата е блокирана.
До блокирање на сметката дојде откако „Студенац“, основан во 1991 година во Омиш, прерасна во синџир со 1.400 продавници и 7.000 вработени. Приходите во 2025 година изнесувале 854 милиони евра. Сепак, годината компанијата ја завршила со загуба од 30,6 милиони евра.
Од „Студенац“, кој полскиот Enterprise Investors го презеде во 2018 година, не ги наведоа конкретните причини за деловните проблеми. Компанијата соопшти дека работи на план за реструктурирање.
Претприемачот Денис Чупиќ, кој има искуство во трговски недвижности и логистика, смета дека „Студенац“ уште од почетокот имал логистички проблеми во управувањето со големиот синџир.
Според него, едно од решенијата е затворање на дел од продавниците, како што направи „Конзум“ кога се најде во слични проблеми.
Хрватскиот портал Index пишува дека за дел од граѓаните во Хрватска „Студенац“ стана синоним за високите цени.
