Здружението што ги претставува најголемите американски авиокомпании се спротивстави на барањето на кинеската авиокомпанија „Ер Чајна“ да воведе дополнителни летови од Пекинг до Њујорк и Вашингтон, во пресрет на планираната средба меѓу кинескиот претседател Си Џинпинг и Доналд Трамп.
Здружението „Airlines for America“, кое ги претставува „American Airlines“, „Delta Air Lines“, „United Airlines“ и други компании, наведува дека се противи на барањето бидејќи американските авиокомпании практично не можат да летаат од источниот брег на САД кон Кина преку рускиот воздушен простор, додека кинеските авиопревозници можат да ја користат таа рута на одредени летови кон САД, пренесува Ројтерс.
„Ер Чајна“ побара одобрение за два дополнителни лета во текот на оваа и следната недела. Американските авиокомпании сметаат дека тие летови треба да бидат третирани како чартер-летови, за нивното одобрување да не отвори можност кинеските превозници да побараат дополнителни редовни линии.
Американското Министерство за транспорт во октомври 2025 година предложи забрана за кинеските авиокомпании да го користат рускиот воздушен простор на летовите меѓу Кина и САД. Како причина беше наведено дека пократкото време на лет им дава предност на кинеските превозници во однос на американските авиокомпании.
Предлогот, сепак, наиде на противење од други американски владини институции и беше ставен надвор од разгледување во пресрет на трговските преговори со Кина.
Американските авиокомпании подолго време ја критикуваат дозволата кинеските превозници да го користат рускиот воздушен простор, бидејќи пократките рути овозможуваат пократко време на лет и помала потрошувачка на гориво, со што се намалуваат трошоците.
Здружението „Airlines for America“ во поднесок објавен денеска наведе дека кинеските авиокомпании имаат „пократки, поевтини и поекономични рути“ на летовите меѓу Кина и САД.
Русија им забрани на американските и на многу други странски авиокомпании да го користат нејзиниот воздушен простор, како одговор на одлуката на Вашингтон од март 2022 година да им забрани на руските авиони да летаат над САД, по почетокот на руската инвазија на Украина.
Кинеските авиокомпании не беа опфатени со таа забрана и продолжија да ја користат можноста за прелетување над рускиот воздушен простор. Тоа им овозможи да го зголемат својот удел на меѓународните линии во однос на конкурентите од други земји.
