Амбасадорите на Европската Унија се согласија да ги продолжат санкциите за илјадници руски поединци и компании само за една недела, за да ги надминат несогласувањата околу нивното продолжување за уште шест месеци, соопшти портпаролот на ирското претседателство со ЕУ.
Тој наведе дека санкциите се продолжени за седум дена за да им се овозможи на земјите членки дополнително време сеопфатно да ги разгледаат предлозите за нивно продолжување.
Амбасадорите на земјите членки на ЕУ имаа рок до вчера да постигнат договор за продолжување на актуелните санкции, но не постигнаа согласност околу тоа дали од листата на санкционирани треба да биде отстранет руско-узбекистанскиот милијардер Алишер Усманов, пишува „Ројтерс“.
Франција и Словачка се залагаат за негово отстранување од листата, повикувајќи се на „загриженост поврзана со националната безбедност“, изјавија европски дипломати.
Санкциите, кои опфаќаат речиси 3.000 компании и поединци, требаше да истечат на 15 септември, но рокот е продолжен за да има дополнително време за разгледување на предлозите за нивно продолжување. Санкциите на ЕУ бараат едногласно одобрување од сите 27 земји членки и мора да се обновуваат на секои шест месеци.
Усманов на почетокот на 2026 година имаше проценето богатство од 18,8 милијарди долари, според индексот на милијардери на „Блумберг“. Тој покрена повеќе судски постапки во Европа со крајна цел да ги укине санкциите против него.
Земјите членки на ЕУ често до последен момент ги разгледуваат прашањата поврзани со продолжувањето на санкциите кон Русија. Во минатото, тоа најчесто се случуваше поради барањата на поранешниот унгарски лидер Виктор Орбан и на Словачка, која има подобри односи со Москва во споредба со повеќето други земји членки.
Во јуни, земјите од ЕУ за првпат се согласија секторските санкции на Унијата, како што се оние поврзани со енергетиката, да ги продолжат за период од една година, со цел да се намали можноста за вакви дебати.
Првите сеопфатни економски и секторски санкции на ЕУ против Русија беа воведени во јули 2014 година, како директен одговор на руската анексија на Крим во март истата година и ескалацијата на конфликтот во источна Украина.
Откако Русија на 24 февруари 2022 година ја започна воената операција во Украина, ЕУ, заедно со Соединетите Американски Држави, Обединетото Кралство и другите партнери од Г7, воведе едни од најстрогите и најсеопфатните пакети санкции во поновата историја.
