Американскиот претседател Доналд Трамп навести дека САД би можеле да останат во Иран и да ја „задржат нафтата“, по примерот на договорот со Венецуела.
Трамп, за време на посетата на Ирска, повтори дека и натаму очекува војната со Иран да заврши оваа година. Тој додаде дека тоа можеби би можело да се случи веднаш по изборите за Конгресот на средината на мандатот, кои во САД се одржуваат во ноември, пренесува Ројтерс.
Во обраќањето на Ирскиот опен во голф, Трамп изјави и дека цената на горивото „драстично ќе падне“ веднаш штом ќе заврши војната со Иран.
Американскиот претседател рече дека САД ќе склучат само „вистински договор“ и дека нема да прифати договор кој, според него, „не вреди ништо“. Тој истакна дека Иран постојано повикува на мировни преговори.
Трамп притоа ја остави отворена и можноста американските сили да останат присутни во Иран, правејќи паралела со договорот меѓу САД и Венецуела, кој беше најавен во август.
„На крајот ќе излеземе од Иран, освен ако не одлучиме да останеме и да ја задржиме нафтата, како во случајот со Венецуела“, изјави Трамп.
Според неговите зборови, приходите што САД ги остваруваат од Венецуела „повеќекратно ја исплатиле војната“.
Изјавата отвора ново прашање околу идниот ангажман на САД во Иран и начинот на кој Вашингтон би можел да ги користи енергетските ресурси како дел од евентуалниот договор за завршување на конфликтот.
