Премиерот Христијан Мицкоски денеска на новинарско прашање за споредба на просечната старосна пензија во време на претходната и актуелната влада посочи дека на месечно ниво таа се зголемува за 325 проценти повеќе отколку во времето на владеењето на СДСМ и ДУИ, потенцирајќи дека е подготвен аргументирано да зборува за тие податоци.
– Гледам како на отворена сцена опозицијата се препелка по она мое интервју дадено на еден национален медиум каде што направив споредба во зголемувањето на старосната пензија на корисниците во периодот од Владата предводена од ВМРО-ДПМНЕ заедно со коалициските партнери ВРЕДИ и ЗНАМ и Владата предводена од СДСМ и ДУИ. При таа споредба јасно кажав дека во овие две години, во овие 24-25 месеци — во случајот конкретно на тоа интервју реков 23 месеци, но сеедно е бидејќи двапати годишно се усогласува пензијата — оваа влада успеала просечно месечно за 296 денари да ја зголеми пензијата, додека претходната влада за 83 месеци успеала за 91 денар. Кога ќе се споредат овие два параметра, доаѓаме до 3,25 пати повеќе сега отколку во времето на владата на СДСМ и ДУИ, или тоа математички прецизно е 325 проценти – потенцираше Мицкоски.
Доколку се споредат првите 25-26 месеци на владата на СДСМ и ДУИ со 25-26 месеци од оваа влада предводена од ВМРО-ДПМНЕ, како што дополни, излегува дека просечната старосна пензија сега се зголемила за 12,5 пати повеќе во споредба со претходната влада.
– Еве уште една споредба ќе им кажам кога станува збор за старосните пензии. Еве да ги споредуваме првите 25-26 месеци од претходната влада во периодот јуни 2017 до јуни-јули 2019 година со овие 25-26 месеци од оваа влада, односно тогаш просечната старосна пензија за првите 25-26 месеци од претходната влада се зголемила за цели 540 денари. Во овие 25-26 месеци на владата предводена од ВМРО-ДПМНЕ, просечната старосна пензија се зголемила за нешто повеќе од 6.800 денари или, математички прецизно, тоа е повеќе од 12,5 пати. Таа е разликата – изјави Мицкоски, при посетата на Прилеп.
Подготвени сме, дополни премиерот, да зборуваме за ова и да ги аргументираме овие податоци, а талогот во опозицијата треба да излезе од безидејноста во која се наоѓа ако сака да биде конкурентна на политичката сцена во Македонија.
– Свесен дека имаме работа со талог во опозицијата. Тие така се препознаа. Јас не го кажав тоа дека се однесува за нив, само спомнав во едно мое друго интервју дека има за жал една мала група во општеството којашто се обидува да внесе преку лаги, конструкции, измислици, немир, чувство на несигурност, недоверба и така натаму. И јас таа мала група ја нареков талог, не знам од кои причини за нив познати опозицијата се препозна во тој талог и од сега па натаму претпоставувам тоа ќе ги следи, но тој талог во опозицијата треба да ја прифати оваа реалност, конечно да се обиде да излезе од таа безидејност во којашто се наоѓа во моментот ако сака да биде конкурентна понатаму на политичката сцена во Македонија. Но, тоа на крајот од денот е нивен проблем, не е наш – рече Мицкоски.
Тој посочи дека Владата има јасна цел – реализација на проекти коишто се испорачуваат на повеќе од 1200 места низ државата, реформи, да го стабилизираме системот што беше уништен. – Ќе треба време, трпение, енергија за сето тоа да се постигне, но мотивирани сме како што никогаш порано и тоа ќе го направиме – изјави премиерот Мицкоски.
