Долгот на Американците по кредитни картички достигна 1,26 билиони долари во вториот квартал од годинава, приближувајќи се до рекордните 1,28 билиони долари забележани на крајот од минатата година, покажаа податоците на Федералните резерви на Њујорк.
За три месеци долгот се зголеми за 21 милијарда долари, а економистите велат дека растот е резултат на високата потрошувачка и поскапувањето на храната, горивата и другите основни производи, пренесе ABC.
Истовремено, расте бројот на домаќинства што доцнат со отплатата на долговите.
Уделот на долговите по кредитни картички со доцнење подолго од 90 дена се зголеми од 7,6 отсто во средината на 2022 година на 12,8 отсто на почетокот од годинава.
Вкупниот долг на американските домаќинства достигна 18,8 билиони долари.
Најголемиот дел од долгот отпаѓа на хипотекарните кредити – 13,12 билиони долари. Следуваат автомобилските кредити со 1,71 билион долари, што претставува нов рекорд, студентскиот долг со 1,65 билиони долари и долгот по кредитни картички.
