Капачите на плажа во местото Казуце, во близина на Марина ди Рагуза на Сицилија, останале во шок кога морските бранови почнале да исфрлаат вреќи полни со пари.
За неколку моменти плажата се претворила во хаос, а десетици луѓе влегле во морето обидувајќи се да ги дофатат банкнотите што плутале кон брегот.
Според италијанската полиција, инцидентот се случил на 28 јули, откако глисер долг околу 5,5 метри останал без гориво недалеку од брегот и почнал неконтролирано да плови. Екипажот побарал помош од крајбрежната стража, но при нејзиното пристигнување лицата на пловилото наводно почнале да фрлаат вреќи со готовина во морето.
Морските струи ги однеле вреќите до плажата, каде што ги забележале бројни капачи. Сцените што следувале, според очевидците, наликувале на филм, додека луѓето се обидувале да дојдат до парите пред да интервенира полицијата.
Полицијата и крајбрежната стража брзо го обезбедиле местото и собрале речиси целата готовина, вклучително и дел од парите што веќе ги земале посетителите на плажата.
На глисерот се наоѓале тројца полнолетни државјани на Малта и едно 13-годишно дете. Полицијата затекнала само еден маж на пловилото, додека, според сведоци, уште две лица избегале кон брегот.
Сите биле приведени на распит, по што биле пуштени да се бранат од слобода, со обврска да им бидат достапни на истражните органи. Засега против нив не е поднесено обвинение.
Италијанските власти сега се обидуваат да утврдат од каде потекнуваат речиси 700.000 евра и зошто толкава сума готовина била превезувана по оваа рута.
Меѓу можните сценарија што се разгледуваат се перење пари, криумчарење готовина, фалсификување банкноти, како и можноста парите да биле наменети за трансакција поврзана со трговија со дрога. Полицијата нагласува дека засега не е исклучена ниту една верзија на настанот и истрагата продолжува.
