Компанијата eBay се согласи да му исплати 48,7 милиони долари на брачен пар од американската сојузна држава Масачусетс, кој тврдеше дека со години бил малтретиран од поранешни вработени во компанијата поради нивното известување за работењето на eBay.
Дејвид и Ина Штајнер, основачи на билтенот EcommerceBytes, специјализиран за индустријата за електронска трговија, ја тужеа компанијата во 2021 година пред Федералниот суд во Бостон. Тие тврдеа дека против нив била водена организирана кампања на заплашување со цел да се замолчи нивното известување за eBay, која вклучувала сајбер-следење, смртни закани и физички надзор.
Федералните обвинители претходно соопштија дека на домашната адреса на брачниот пар пристигнувале анонимни пратки со живи лебарки и пајаци, погребен венец, како и крвава маска во облик на свинска глава.
Според обвинението, поранешните вработени испраќале и порнографски списанија до соседите, адресирани на името на сопругот, а планирале и провала во нивната гаража за да постават GPS-уред на автомобилот.
Според постигнатата спогодба, семејството Штајнер ќе добие отштета од 48,7 милиони долари. Од таа сума, eBay ќе исплати 46,15 милиони долари, поранешниот извршен директор Девин Венинг два милиони долари, поранешната директорка Венди Џонс 500.000 долари, а поранешниот директор Стив Вајмер 50.000 долари.
Компанијата ќе финансира и шест милиони долари донации за непрофитни организации, додека Венинг дополнително ќе донира еден милион долари на организација посветена на заштитата на правата загарантирани со Првиот амандман на американскиот Устав, во име на Ина Штајнер.
Адвокатот Кристофер Марфи изјави дека случајот претставувал напад врз слободата на говорот и слободата на медиумите.
Во новото соопштение, eBay повторно им се извини на Штајнерови и порача:
„Она на што беа изложени Штајнерови од поранешни вработени во eBay во 2019 година беше погрешно, срамно и никогаш не смееше да се случи.“
Компанијата додаде дека по овој случај го променила раководството и ги зајакнала внатрешните процедури и етичките стандарди.
