Европската комисија, под одредени услови, го одобри преземањето на компанијата Warner Bros Discovery од страна на Paramount Skydance во зделка вредна 110 милијарди американски долари (околу 94 милијарди евра).
Со тоа е отстранета една од најголемите регулаторни пречки за реализација на оваа медиумска трансакција, пренесува „Ројтерс“.
Европската комисија соопшти дека одобрението е условено со тоа Paramount во рок од 13 месеци по завршувањето на трансакцијата да се повлече од заедничкото претпријатие United International Pictures (UIP), кое во Европа работи во партнерство со Universal Pictures.
Покрај тоа, Paramount се обврза во следните 10 години да не склучува нови договори со Universal за дистрибуција на филмови во Европа, ниту дистрибуцијата на киноприкажувањата на Warner Bros. да ја префрли на сопствената дистрибутивна мрежа.
Европската комисија оцени дека овие мерки ќе ја зачуваат конкуренцијата на пазарот за кино-дистрибуција на филмови во Европската економска област.
Иако компанијата доби зелено светло од Европската Унија, трансакцијата и натаму се соочува со сериозни пречки во Соединетите Американски Држави.
Американски федерален суд привремено ја запре реализацијата на преземањето по тужба поднесена од коалиција на сојузни држави, предводена од Калифорнија, кои тврдат дека спојувањето би ја нарушило конкуренцијата на пазарот на медиуми и забавната индустрија.
Иако Министерството за правда на САД претходно ја одобри трансакцијата, судската постапка би можела значително да го одложи нејзиното финализирање.
Според „Ројтерс“, доколку договорот не биде завршен до 30 септември, Paramount Skydance би можел да плаќа договорен надомест за доцнење од околу седум милиони долари дневно (приближно шест милиони евра дневно).
Против трансакцијата тужба поднесе и Американското здружение на филмски и телевизиски сценаристи (Writers Guild of America), кое предупреди дека спојувањето би можело негативно да влијае врз работните места и конкуренцијата во забавната индустрија.
