Десетици илјади вработени во германскиот производител на автомобили „Мерцедес-Бенц“ протестираа низ Германија против најавените мерки за штедење и можното влошување на условите за работа.
Според најголемиот германски индустриски синдикат IG Metall, на протестите учествувале повеќе од 33.000 работници од фабриките во Зинделфинген, Штутгарт, Раштат, Купенхајм, Бремен, Берлин, Хамбург и Гермерсхајм. Од компанијата, пак, тврдат дека бројот на учесници бил речиси двојно помал.
Причина за незадоволството се плановите на управата за дополнително намалување на трошоците поради кризата во автомобилската индустрија.
Во писмо испратено до вработените пред околу една недела, раководството соопштило дека компанијата мора да продолжи со интензивни мерки за намалување на трошоците за да остане ценовно конкурентна на пазарот.
„И покрај сите наши напори, ситуацијата во Германија денес е драматична“, се наведува во писмото.
Компанијата соопшти дека околу 90.000 од вкупно 108.000 вработени во Германија нема да ја добијат очекуваната вонредна исплата во јули, туку таа ќе биде одложена за следната година.
Меѓу предложените мерки е и продолжување на работното време без зголемување на платите.
Од IG Metall ја обвинија управата дека се обидува да ги укине стекнатите работнички права и предупредија дека ќе следуваат нови протести доколку компанијата не се откаже од планираните мерки.
Лидерката на синдикатот, Кристијане Бенер, на собир во Дизелдорф изјави дека силната автомобилска индустрија може да се обезбеди само преку инвестиции во производите, производствените капацитети и вработените.
Синдикатот најави дека протестните акции ќе продолжат во текот на летото и есента, а слични активности се очекуваат и во други германски автомобилски компании.
