Пристанишните работници во Шведска денеска ги проширија протестите против компанијата Тесла и спречуваат истоварување на електричните возила на компанијата на шведските пристаништа.
На овој начин тие сакаат да го поддржат штрајкот на околу 130 механичари кои ги сервисираат електричните автомобили на Tesla во Шведска, пренесува Reuters.
Механичарите протестираат од 27 октомври и бараат колективни договори од Тесла, а на 7 ноември им се придружија и пристанишните работници.
Шведските електричари денеска во знак на солидарност со штрајкувачите го прекинаа сервисот и поправката на возилата на Tesla низ целата земја. Протестот вклучува и чистачи кои одбиваат да одржуваат хигиена во зградите на Тесла, како и поштенски работници кои повеќе не доставуваат пошта на адресата на компанијата.
Извршниот директор на Tesla, Илон Маск се противи на синдикатите, а оваа американска компанија успешно ги избегна колективните договори за своите 127.000 вработени за да гарантира плати и услови за работа.
Синдикатите во САД и Германија досега не успеаја да ја принудат Тесла да ги прифати овие договори. Доколку шведските синдикати го скршат отпорот на американската компанија, тоа може да стане преседан за другите земји.
