Најголемиот руски производител на течен природен гас, Новатек, потпиша прелиминарен договор со виетнамски купувач и е подготвен да започне со испораки во блиска иднина.
Ова го изјави денес извршниот директор на таа компанија, Леонид Мишелсон, за руската државна телевизија.
Новатек преговара со клиентите повеќе од пет години, а неодамна беше потпишан прелиминарен договор за снабдување со еден од нив, потсетува Ројтерс.
Рускиот претседател Владимир Путин овој месец предупреди дека Русија може веднаш да ги прекине испораките на гас за Европа и да бара долгорочни договори на други пазари.
Меѓувладиниот договор за изградба на првата нуклеарна централа во Виетнам ќе биде потпишан по денешните разговори, изјави рускиот премиер Михаил Мишустин за време на состанокот со виетнамскиот премиер Фам Мин Чин, пренесува ТАСС.
„Меѓувладиниот договор за изградба на првата нуклеарна централа на територијата на Виетнам ќе биде потпишан по завршувањето на денешните разговори“, рече Мишустин.
„Изградбата на нуклеарната централа ќе даде силен поттик за развој на соработката во сродни области – високи технологии, фундаментално и применето истражување“, додаде тој.
