Словачкиот премиер Роберт Фицо изјави дека има тајни сателитски снимки кои докажуваат дека нафтоводот Дружба, кој се користи за транспорт на руска нафта, не е оштетен.
Фицо директно го обвини украинскиот претседател Володимир Зеленски дека лаже за состојбата на нафтоводот, објавува „Киев Индепендент“.
„Освен еден мал резервоар за складирање, главната рута на нафтоводот Дружба не е оштетена. Затоа, претседателот Зеленски очигледно лаже“, рече Фицо, објавува словачкиот портал „Актуелност“. „Веројатно мислел дека на овој начин може да ги уценува Словачка и Унгарија, иако не ми е јасно што сака да постигне“.
Словачкиот премиер не можеше да им ги достави снимките на медиумите, тврдејќи дека фотографиите се класифицирани и не можат да се споделат. Нафтоводот, кој поминува низ Украина, престана да работи во јануари откако Киев соопшти дека е оштетен во руски напад на западот од земјата. Фицо, исто така, на крајот на февруари тврдеше дека словачката разузнавачка служба „потврдува дека нафтоводот не е оштетен и дека ништо не го спречува транзитот на нафта“.
Ни Словачка ниту Унгарија не дадоа докази за нивните тврдења дека Украина намерно го запрела транзитот на руска нафта.
Како одговор на обвинувањата, советникот на Зеленски, Дмитро Литвин, рече дека Украина го покани Фицо лично да разговара за овие „сериозни прашања“, наместо да комуницира преку социјалните медиуми.
Словачка објави дека ќе ги прекине итните испораки на електрична енергија за Украина како одговор на прекинатите испораки на нафта, што предизвика критики од Киев. Унгарија и Словачка, исто така, го прекинаа извозот на дизел во Украина.
„Украина купува електрична енергија, не ја добива бесплатно. Владата на Фицо на тој начин само ќе им го одземе профитот на словачките компании, а Украина ќе добива електрична енергија од други извори“, изјави портпаролот на украинското Министерство за надворешни работи, Георгиј Тихи, за Kyiv Independent.
Властите во Словачка и Унгарија се сметаат за најпро-Кремљски настроени во Европската Унија. Додека ЕУ се стреми да ја намали зависноста од руската нафта, словачките и унгарските претставници се спротивставија на мерката.
Во меѓувреме, унгарскиот министер за надворешни работи, Петер Сијарто, се сретна со рускиот претседател Владимир Путин во Москва на 4 март. Сијарто договори ослободување на двајца украински воени затвореници кои наводно имаат и унгарско државјанство.
