Зголемувањето на цените на нафтата, поттикнато од загриженоста за можни прекини во снабдувањето поврзани со ширењето на конфликтот на Блискиот Исток, би можело да и користи на Русија, предупредува енергетски аналитичар.
„Способноста на Русија да ја продолжи војната во Украина е во голема мера поврзана со приходите од нафта, а со овие настани руската држава добива дополнителни приходи“, изјави Симоне Таљапиетра, виш соработник во тинк-тенкот Бругел, за CNN.
„Ова е добра вест за Русија, а лоша вест за Украина“, додаде тој.
Цената на нафтата Брент, глобалниот репер, накратко се искачи над 82 долари за барел во понеделник, пред да ги намали некои од добивките. Попладнето, се тргуваше за околу 6 проценти повисоко од претходниот ден, на ниво од приближно 77 долари за барел.
Иако приходите од извоз на нафта на Русија значително се намалија во последните години, приходите од производството на сурова нафта остануваат значаен извор на средства за буџетот на Кремљ – и за воените напори.
Според Оксфордскиот институт за енергетски студии, приходите од нафта и природен гас минатата година сочинувале околу 23 проценти од федералниот буџет на Русија.
„Секое зголемување на цената на нафтата го зголемува буџетот и помага во финансирањето на (руската) воена машинерија во Украина“, изјави Таљапиетра за Си-Ен-Ен.
