Жителите на Венеција бурно реагираа на веста дека Џеф Безос, еден од најбогатите луѓе во светот, ќе се ожени со Лорен Санчез во градот кој веќе е загрозен од масовниот туризам и големите настани.
Марта Соторива, наставничка од Венеција, не престанува да се бори, пишува Гардијан. Таа долго време е активна во кампањи против огромните крстосувачки бродови и постојано растечките цени за изнајмување, а сега се приклучи на борбата против, како што вели, „уште еден голем настан“ што се заканува да го претвори нејзиниот град во игралиште за богатите.
Во оваа прилика, Соторива се фокусираше на гламурозната свадба на основачот на Амазон, милијардерот Џеф Безос, и поранешната телевизиска новинарка Лорен Санчез. Повеќедневната свадбена прослава треба да започне на 24 јуни, а се шпекулира дека двојката ќе го каже своето судбоносно „да“ во базиликата Сан Џорџо, на истоимениот венецијански остров.
Заедно со десетици други активисти, Соторива подготвува транспаренти, дистрибуира летоци и испраќа јасни пораки преку мегафон на плоштадите. Како дел од кампањата „Нема простор за Безос“, низ целиот град се појавија постери со главата на Безос на ракета, алузија на неговата вселенска компанија „Блу Ориџин“, а активистите ја ширеа пораката на рурални фестивали за храна и јавни форуми.
Најзначајната акција досега беше поставувањето транспарент „No Bezos“ на камбанаријата на базиликата Сан Џорџо, токму таму каде што, според гласините, треба да се одржи свадбата.
„Има многу гнев во воздухот затоа што градската власт повторно се покори на логиката на профит – нашиот град беше продаден на најбогатиот понудувач“, рече Соторива.
„Секој пат кога ќе се случи ваков настан, градот застанува, одредени делови стануваат недостапни, а доаѓаат уште повеќе туристи. Оваа свадба е навистина симбол на сè што не е во ред со Венеција.“
За разлика од свадбата на Џорџ Клуни и Амал Аламудин во 2014 година, која многу жители на Венеција ја поздравија со ентузијазам, свадбата на Безос предизвика многу поголем отпор. Градоначалникот Луиџи Бруњаро, кој ја потврди венчавката уште во март, оттогаш е под постојани критики од активисти и политички противници.
Иако градската власт тврди дека луксузната венчавка, чија цена се проценува на околу 9,8 милиони евра, ќе донесе придобивки за градот, советникот од опозицијата Џовани Андреа Мартини предупредува дека обичните граѓани нема да добијат ништо од тоа. Тој предложи Безос, како трет најбогат човек во светот, да финансира реновирање на повеќе од 1.000 напуштени градски станови за да се ублажи кризата со достапни станови.
Од друга страна, градоначалникот Бруњаро тврди дека венчавката нема да предизвика никакви нарушувања и ја нарече кампањата против Безос „срамна“.
Сотирива нагласува дека проблемот не е нужно ограничен само на младенците, иако признава дека поврзаноста на Безос со Доналд Трамп и негативната репутација на Амазон кога станува збор за работничките права не инспирираат доверба.
