Растоварувањето на стотици контејнери со увезени зрна кафе на пристаништата на источниот брег на Соединетите Држави е запрено со штрајк на пристанишните работници, што го влошува и онака оскудното снабдување со кафе во земјата.
Одложувањата во испораката на увезено кафе до американските потрошувачи би можеле дополнително да ги зголемат цените на зрната кафе, кои минатата недела достигнаа највисоки нивоа во последните неколку години, објави Ројтерс.
Залихите на кафе во САД се на историски најниски нивоа, велат трговците, бидејќи увозниците избегнувале складирање залихи за да ги намалат трошоците за складирање во период на високи каматни стапки.
Околу 45.000 пристанишни работници во 36 пристаништа, членки на Меѓународната асоцијација на транспортери, неодамна започнаа со прекин на работата откако истече постоечкиот договор меѓу нив и пристаништата.
Штрајкот се случи поради недоволните плати и стравот од губење на работни места по планираната автоматизација на пристаништата, објави АП.
Американскиот претседател Џозеф Бајден рече дека е време сопствениците на пристаништата да го решат штрајкот бидејќи тој ја блокира испораката на стоки во САД.
